J.F. Laldailova
J.F. Laldailova (1925-1979) hi Mizo ṭawng tihhmasawn leh tihrualkhai lama thawh hlâwk tak, Sâp ṭawng-Mizo ṭawng thufiahbu hman hlawh êm êm English-Lushai dictionary siamtu a ni. Ṭawnglettu, thufiahbu siammi leh chanchinbumi nih a fàwm a ni.
| Hming | Joseph Francis Laldailova |
|---|---|
| Pian ni | Pawlkût 9, 1925 |
| Thih ni | Nikir 7, 1979 (Kum 54) |
| Chhungte | Pu Peter Thangphunga (Pa) Pi Saichhungi (Nu) |
| Hna | RAF, Lexicographer, Translator, Editor |
| Bîk nihna | Mizo Catholic baptisma chang hmasa ber |
01. Pian leh murna
Laldailova hi Mizoram Catholic Kohhran dintu Pu Peter Thangphunga leh Pi Saichhungi-te fa niin kum 1925, Pawlkût thla ni 9 khan a lo piang a. Baptisma a chanin a Kristian hmingah Joseph Francis tih phuahin J(oseph) F(rancis) Laldailova tiin hriat a lo ni ta a ni. Mizo Catholic Kohhran zinga Baptisma chang hmasa ber a ni nghe nghe.
02. A naupan lai
Kum sawm mi lek a nihin kum 1935 khan Chittagong-ah High School a lût a. Mizo dang awm ve lo mah se, naupang tumruh mi a nih avangin chhel takin a zir a. Ṭum 22 exam a hmachhawnah ṭum 17 ngawt pakhatna dinhmun a hauh thei a ni. Sâp ṭawng thuhlarila a tui avangin Mizo ṭawng hloh vek khawpin a zir a. Indopui II-naah sikul khâr a nih avangin pâwl 8 thleng chauh a zir hman. Mizorama a lo kir leh hnuah hranpain Mizo ṭawng a zir leh a. Mizo ṭawng pawh ani tluka duhtui leh thiam an awm lo ang tih khawp hiala thiam a ni leh ta mai a ni!
“Sap ramah hetiang hi tirhchhiahah kan hmang ngai lo, lehkha zirtir leh zawk rawh u.
— British Major, Boys’ M.E. School Recruitment
03. Hna dil
Mizorama a lo chhuah hian an chhungkua an harsa hle a. Chutih lai chuan Boys’ M.E. School-ah 93rd Brigade an inkulh a. Peon hna thawktu tur an duh tih hriain a pa nen an va dil a. Major-in a sâp ṭawng thiamzia a hriatin, "Sap ramah hetiang hi tirhchhiahah kan hmang ngai lo, lehkha zirtir leh zawk rawh u," a lo ti a. Mahse, an chhungkaw dinhmunin a zir miau si loh avangin a chhunzawm thei ta chuang lo va. Royal Air Force a zawm ta a ni. Rimawi a ngainat avangin tawtawrawt ham a zir a, a thiam hle. Band Master hial a ni pha.
04. A kutchhuak lam
Lenkhawm hian a lung a tilêng thei em em a; Chheih zai leh Tlanglam zai te pawh a thiamin a ngaina hle. Lehkhabu lehlin lamah ei zawngin, Thu ngaihnawm bu leh Chanchinbu a enkawl a. Baibul lehlina a famkim lo lai leh duhthusam lo laite huaisen takin a sawisel ṭhin. Mizo-English Dictionary leh English-Mizo Dictionary a siam a. Tun thlengin zirlaite tan a ṭangkai em em a ni. Mizo zirlai tam zâwkte sâp ṭawng zir ṭanna hnâr ber pakhat a ni.
05. Hun hnuhnung
Kum 1978 Khuangchawi thla khan hrisel lohna a neih tak avangin Dibrugarh leh Silchar-ah te a inentir a. Dibrugarh damdawi in aṭangin dam ṭha angreng takin kum 1979, Vau thla ni 12 khan a lo häwng a. Mahse rei vak lo hnuah Civil Hospital-ah thla khat zet a awm leh a. Kum 1979, Ṭomir thla ni 24-ah beidawng takin mahni in lamah a häwng leh a. Kum 1979, Nikir thla ni 7, zing dâr ruk-ah William Shakespeare-a ṭawng kulmût pui pui pawh Zoṭawng nalh taka Zofate lehlinsaktu, zirlaite thufiahbu rintlâk taka châwmtu chuan he khawvel hi a chhuahsan ta a ni.
Pian leh Murna
Pawlkût thla ni 9-ah a lo piang. Mizo Catholic baptisma chang hmasa ber a ni.
Sikul
Chittagong High School-ah lutin ṭum 22 exam-ah 17-ah pakhatna a ni.
Indopui Hnua A Hna
Sikul a tawp a. RAF zawmin Band Master-ah te a ṭang zui a.
Hrisel lohna
Dibrugarh leh Silchar damdawi inah a inentir ṭhin.
Thihna
Nikir thla ni 7 khan kum 54 mi niin he khawvel hi a chhuahsan.
Source: Wikipedia Incubator